Sport - sagdynlygyň binýady.
199 Hormatly Prezidentimiziň baştutanlygynda ýurdumyzda durmuşa geçirilýän beýik işleriň belentden dabaralanýan ýyly bolan 2022-nji ýyl hem tamamlanyp barýar. Täze ýyl baýramçylygynyň şatlyk-şowhuna beslenýän günlerinde Türkmenistanyň Kärdeşler arkalaşyklarynyň Milli merkeziniň iş meýilnamasyna laýyklykda, TKA-nyň Daşoguz welaýat birleşmesiniň işgärleriniň hem-de işjeň agzalarynyň gatnaşmagynda «Awaza» milli syýahatçylyk zolagyndaky «Daýanç» sagaldyş we dynç alyş merkezinde 16-20-nji dekabr aralygynda okuw maslahaty geçirildi. Onuň dowamynda guralan çäreler, maslahatlar, söhbetdeşlikler, sport çäreleri halkymyzyň mynasyp zähmet çekmegi hem-de dynç almagy üçin döredilýän ajaýyp mümkinçilikleriň aýdyň nyşanyna öwrüldi.
«Awaza» milli syýahatçylyk zolagyndaky «Daýanç» sagaldyş we dynç alyş merkezinde guralan okuw maslahatynyň dowamynda birnäçe sport çäreleri geçirildi. Sagdyn durmuş ýörelgelerine ygrarly bolan ildeşlerimiz sport çärelerine höwesli gatnaşdylar. Sagaldyş we dynç alyş merkeziniň türgenleşik zalynda köpçülikleýin bedenterbiýe maşklary ýerine ýetirildi. Bu ýerde ornaşdyrylan türgenleşik enjamlarynyň häzirki zaman tehnologiýalary esasynda gurnalandygyny bellemek möhümdir.
Şeýle hem bu ýerde erkekleriň we zenanlaryň arasynda şaşka, küşt, düzzüm boýunça ýaryşlar geçirildi. Merkeziň medeniýet merkeziniň eýwanynda geçirilen özara ýaryşlarda ildeşlerimiz paýhas oýunlaryna bolan ukyplaryny görkezdiler. Gyzykly geçen sport ýaryşlary okuw maslahatyna gatnaşýan ildeşlerimizde ýatdan çykmajak täsirleri galdyrdy. Dynç alşyň sport bilen sazlaşykda guralmagy oňa gatnaşanlaryň göwnüne ganat berdi. Geçirilen sport çäreleri okuw maslahatyna gatnaşýan ildeşlerimiziň ruhlaryny göterdi. Sport çärelerine işjeň gatnaşan ildeşlerimiz ýurdumyzda sagdyn durmuş ýörelgesini berkarar etmekde beýik işleri durmuşa geçirýän hormatly Prezidentimiziň adyna alkyş sözlerini aýtdylar.
Rejepgeldi HUDAÝGULYÝEW,
Daşoguz welaýat maliýe-ykdysady orta
hünär okuw mekdebiniň
bedenterbiýe mugallymy,
KA-nyň işjeň agzasy.
2022-nji ýylyň 22-nji dekabr
"Daşoguz habarlary" gazeti
